Nagpublic apology babaen iti Bombo Radyo Baguio ti maysa a lalaki kalpasan a natiliwan daytoy nga agvidvideo iti uneg ti maysa a mall iti siudad ti Baguio.
Iti interview ti Bombo Radyo, kinuna ni Bernard Dulay a bayat ti panagpilana iti maysa a paggatangan ket adda ti nakitana a babai a nakasuot ti mini-skirt.
Inaklonna a napintas ti langa ti babai rason a vinideona daytoy.
Nupay kasta, nadlaw ti nasao a babai ti ar-aramiden ni Dulay a panagvideo.
Gapu iti daytoy, agkidkiddaw iti pammakawan ni Dulay kagiddan ti panang-aklonna a nagbiddot daytoy.
Naammoan met a saan laeng a daytoy ti umuna a gundaway a nagvideo ti nasao a lalaki gapu ta adda metten dagiti immuna a vinideona a babbai partikular dagiti nakasuot iti mini-skirt ngem saan a naduktalan dagiti biktima.
Iti baet daytoy, inkarina met a saannan nga uliten pay ti kapada nga insidente.
