BAGUIO CITY – Nakemmeg ti maysa a merchandizer gapu iti maatap a panagtakawna iti uneg ti maysa nga establishimento sadiay Mabini Street, Baguio City.
Nabigbig daytoy a ni Apolonio Buclid Ligaten Jr., 38-anyos, naasawan, residente ti Betag, La Trinidad, Benguet ken tubo ti Kabacan, Cotabato.
Maibasar iti report ti pulisya, binalkot ti suspek iti pura a lupot ti maysa nga energizer metal light flashlight nga agatad iti P239.75.
Kalpasanna ket inlemmengna iti kilikilina.
Nupay kasta, nakita daytoy ti security guard isut gapuna nga imbilinna ti panangiruar ti suspek iti nasao a banag.
Napaay pay ti suspek a nangipakita iti resibo iti nasao a flashlight.
Gapu iti daytoy, impaimada ti nasao a suspek iti pulisya nga ita ket sumangsango iti kaskenan a kaso.
