Maisagsagana itan ti panakaipila ti kaso nga multiple murder and frustrated murder kontra iti maysa a miembro ti Citizen Armed Force Geographical Unit wenno CAFGU a maatap a nangpalpaltog kadagiti kakaduana iti uneg ti patrol base dagitoy sadiay Pinukpuk, Kalinga idi rabii, a nangitunda iti panakatay ti tallo ken panakaospital ti dua a dadduma pay.
Daytoy ket sigun iti pankaiuman ti Bombo Radyo Baguio kenni Police Capt. Ruff Manganip, public information officer ti Kalinga Police Provincial Office.
Kinunana nga iggem itan ti pulisya ti saan a nainaganan a suspek kalpasan a nakemmeg daytoy itay pangaldaw sadiay Sitio Allangigan Barangay Apatan.
Innayonna nga napasamak ti insidente alas 7:47 bayat nga agsagsagana a mangan dagiti biktima iti uneg ti patrol base-da iti nasao a lugar.
Insalaysay ti opisyal nga agleppasen ti duty ti suspek iti dayta nga oras idi kellaat a nangisawang daytoy iti dakes a sasao kontra kadagiti biktima ken pinalpaltoganna dagitoy babaen iti issued fire-arm na nga M16-A1.
Dead-on-the-spot iti nasao nga insidente dagiti dua a biktima bayat a dead on arrival iti ospital ti maysa kadagitoy.
Innayonna nga agtultuloy pay laeng a matamtaming iti pagagasan dagiti dua a nadangran.
Dadduma kadagiti biktima ket nagsagrap iti tama ti bala ti paltog iti tengged ken abagada.
Kinunana pay ni Capt. Manganip nga agtultuloy pay laeng nga im-imbestigaran dagiti autoridad ti motibo iti nasao a krimen.
Nupay kasta, naammuan nga agtumtumar iti medisina ti suspek ken nailadawan daytoy kas maysa a naulimek a tao.
Kagiddan iti daytoy, umap-apela ti opisyal kadagiti umili iti Kalinga nga agtalinaedda a kalmado ken ipabiyangda kadagiti autoridad ken iti proseso ti linteg ti nasao a kaso.//Alfred Pudsoc
