BAGUIO CITY – Agtataripnong dagiti panglakayen ken opisial ti Butbut Tribe manipud Tinglayan, Kalinga ken Betwagan Tribe manipud Sadanga, Mountain Province inton December 16 para iti panakatalantan ti pagin-inagawan dagitoy a disso iti nagbeddenganda.
Sigun iti Police Regional Office Cordillera (PROCOR), tarigagay ti taripnong a maurnos ti susik iti nagbaetan ti dua a tribo ken tapno mabigbig ti nagbeddengan a maipasidong iti validation babaen iti National Commission on Indigenous Peoples (NCIP).
Napagnummuan ti panagsasarita ti dua a tribo kabayatan ti peace dialogue nga indauluan ni PROCOR Regional director PBrig. Gen. R’win Pagkalinawan sadiay Camp Captain Juan M. Duyan, Bulanao, Tabuk City, Kalinga idi December 3.
Nakipaset iti peace dialogue dagiti opisial ken panglakayen ti dua a tribo ken dagiti opisial dagiti maseknan nga ahensia ti gobierno.
Ibagi ni Felix Pan-oy ti tribo ti Butbut bayat a ni Barangay Chairman Agustin Agpawan ti mangibagi iti Betwagan ken nagnummuanda a mangitugotda iti sag-15 a panglakayen ken opisial dagitoy inton December 16 tapno maurnos ti nabayagen a boundary dispute.
Nangiwaras metten ti PROCOR kadagiti kameng daytoy nga agserbi a peace-keeping contingent iti dua a barangay.
Impanamnama pay ni Pagkalinawan ti sibubukel a suporta ti PROCOR iti panakagun-od ti long-term solution iti nasao a tribal conflict.
Sigun iti PROCOR, adun dagiti pimmusay bayat a naapektaran ti panagbiag dagiti tattao no maipapan iti social ken ekonomia gapu iti nasao a susik ti dua a tribo iti baet ti panangikagumaan dagiti otoridad a mangrisot iti daytoy a parikot.
