Mabalballaagan dagiti nagbakwit a sangapulo ket tallo a pamilya a residente idiay Camp 3, South Dap-ay, Acupan, Virac, Itogon a saan pay a mabalin nga agsubli kadagiti bukodda a pagtaengan.
Iti pannakiuman ti Bombo Radyo kenni Cyril Catbagan, dadaulo ti Municipal Disaster Risk Reduction and Management Office-Itogon, Benguet, kinunana a saan pay a mabalin nga agsubli dagitoy agsipud ta narisgo ti nasao a lugar.
Gapu iti dayta, agtultuloy ti panagbantay ken panagmonitor dagitoy kadagiti aglawlaw ti nasao a lugar tapno masukimat ti pamay-an tapno sumardeng ti panagreggaay ti daga nga intunda dagiti nagsisinaruno a bagyo.
Pagdandanagan metlaeng ni Catbagan ti posible a pannakairaman ti baba a paset ti nasao a lugar partikular iti Camp 2, Virac, Itogon, Benguet iti kanito a lumawa ti nasao a karayan.
Iti baet dayta, napaneknekan manen ti bayanihan wenno binnadang culture iti rehiyon Cordillera babaen iti panagtitinulong dagiti umili sadiay a nangipaigid kadagiti batbato a natnag manipud iti ngato a paset ti bantay.
Kabayatanna, nagballaag metlaeng daytoy kadagiti umili a liklikanda ti panagtrabaho nangruna dagiti small scale miners tapno maliklikan ti insidente. Malaksid iti dayta, nagballaag metlaeng daytoy kadagiti turista a saan paylaeng nga agpasyar kadagiti tourist spots ti nasao a munisipyo agsipud ta delikado daytoy partikular ita a panawen ti panagtutudo.
