Inwaragawag ti Commission on Elections (Comelec) a mangipakatda kadagiti naing-inget a wagas tapno malapdan ti vote-buying, vote-selling ken malapdan ti abuse of state resources wenno ASR para iti Eleksyon 2025.
Iti panangiyuswat manen ti Committee on Kontra Bigay, kinuna ni Commissioner Ernesto Maceda Jr. a napigpigsa a mekanismo ti maipatungpal tapno masigurado ti integridad iti umadanin nga eleksion ken tapno malapdan ti “illicit use of the state resources” bayat ti panagkakampanya.
Ti abuse of state resources wenno ASR ket ti saan a nasayaat a panagaramat ti “resources” ti gobierno.
Kadawyan a karaman ti panagaramat kadagiti pasilidad ken lugan ti gobierno para iti aktibidad a mainaig iti kampania.
Kabayatanna,immunan nga impakaamo ti Commission on Elections nga ipawilda ti panangiwaras ti amin a kita ti cash assistance (ayuda), sangapulo nga aldaw sakbay ti eleksion inton Mayo.
Nangipaulog pay ti nasao nga ahensua ti Resolution No. 11104 a mangipalubos kadagiti pannakabagi ti linteg a makemmeg dagiti vote buyers ken vote sellers nga awanan ti warrant iti kanito a matakuatanda iti nasao nga aramid.
Para iti biang ni Comelec chairperson George Erwin Garcia, kidkiddawenna kadagiti registered voters a saanda nga ilako dagiti botosda gaputa patienna a masakbayan ti ilaklakoda.
