TABUK CITY, KALINGA – Nakumpiskar ti nasurok P23-million ti gatadna a dried marijuana bricks idiay Purok 5, Bulanao, Tabuk City, Kalinga idi kalman, Setyembre 27, iti agdama a tawen.
Iti drug interdiction operation, nakemmeg ti tallo a drug personalities.
Nabigbig dagitoy a da Galvez Paul Andrei y Barnabe, 29-anyos ken residente idi Bulacan; Kenedy Aclao, 21-anyos, naasawaan; ken Francis Bagtang, 25-anyos, mannalon ken agpada dagitoy a residente ti ti Buscalan, Tinglayan.
Iti exclusive interview ti Bombo Radyo kenni Police Master Sargeant Prodencio Atas, panakangiwat ti Tabuk City Police Office, nagtaud ti Haima MPV manipud Tinglayan, Kalinga nu sadino imetna ti 192 bricks a nakubotan ti transparent plastic nga agdagsen iti agarup 192 kilos.
Maibasar iti imbestigasyon, nagbisita laeng ti maysa kadagiti indibidual a natiliw.
Sigun kenni PMSg. Atas, nabayag a binantayan dagiti operatiba dagiti nadakamat nga indibidual.
Nakumpiskar amin dagiti ebidensiya ken kagawaan a naaramat iti nasao a transaction.
Naglabsing dagitoy iti kaso a Republic Act 9165 wenno Comprehensive Dangerous Drugs Act of 2002.
Naiturong dagiti suspek iti Tabuk City Police Station para iti umno a dokumentasyon.
Kinunana nga agtultuloy a maipatpatungpal ti Oplan Sita wenno check point sadino man a lugar ken aniaman nga oras.
Sigun met kenni PLtCol. Jolly Ngaya-an, ipakpakita ti balligi nga operasyon ti komitmentda ken napinget a panagtrabaho dagitoy.
Nagyaman pay daytoy iti aktibo a suporta ti komunidad para iti panagballigi iti nasao nga operasyon.
Impaganetgetna nga agtultuloy ti nainget a kampanya da kontra iligal a droga ken daduma pay a kita ti kriminalidad tapno mapagtalinaed ti kinatalged iti publiko.
Kabayatanna, daytoyen ti maikadwa a daras a nakakumpiskar dagiti maseknan iti dakkel a gatad ti iligal a droga.
