BAGUIO CITY – Kinumpiskar dagiti otoridad ti nasurok P3-M ti gatadna a maatap nga ecstasy iti naisayangkat nga operasyon sadiay Ambuclao Road, Gibraltar, Baguio City ita a malem.
Maibasar iti impormasyon, ti parcel ket maysa a karton nga agmaris ti yellow ken naglaon ti maysa a paris ti sapatos, dua a bed sheets ken uppat nga improvised pouches a naglaon ti mapapati nga ecstasy a dumanon ti 1,783 a tableta.
Nagtaud kenni Fostina Obobo manipud Neuss, Germany ti nasao a parcel bayat a recipient wenno consignee ket ni Joyce Ann Jores San Antonio.
Sigun kenni Investigation Agent Officer 3 Gerald Javier, team leader ti PDEA-NCR, inkustodiya ti Bureau of Customs ti nasao a parcel kalpasan a naduktalan ti kaadda ti maatap nga iligal a droga.
Kinunana a gaputa kayatda nga adda ti matiliw ket naipaima ti parcel iti PDEA para iti controlled delivery nga operasyon.
Gapu iti daytoy, intulod ti PDEA ti parcel iti address ni San Antonio a nailanad iti padala, no sadino, ti address ket iti maysa a condominium ditoy siudad.
Nupay kasta, ti managan Elisa Agguirre Millare ti nangawat iti parcel a nagresulta iti panangtiliwda kenkuana.
Naamuan a ni Millare ket maysa a drug personality, 52-anyos ken residente ti Mabilog, New Era, Quezon City.
Iti agdama, nainget nga imbestigaran ti PDEA ni Millare para iti panakaduktal ti ultimate consignee ti package.
Naisayangkat ti operasyon iti panagtinnulong dagiti operatiba ti PDEA-Cordillera, Baguio City Police Office ken NAIA-Agency Drug Interdiction Task Group. – report ni Bombo Janice Denis
