![](https://img.bomboradyo.com/baguio/2022/07/Officials-file-charges-against-corrupt-officials.jpg)
BAGUIO CITY – Impila ni Baguio City Mayor Benjamin Magalong kadwana da Market Superintendent Marieta Alvarez ken BCPO Director PCol. Glenn Lonogan ti kaso a Malversation ken Falsification kontra kadagiti uppat nga empleyado ti Treasury.
Daytoy ket kalpasan a naduktalan ti receipt padding wenno ti panangtamper-da iti resibo dagiti negosyante wenno stall owners iti Baguio City Public Market.
Sigun kenni Mayor Magalong, natiliw dagiti uppat a revenue collectors kasaruno ti report ti Market Superintendent nga adda ti mapaspasamak a kurapsyon iti merkado publiko.
Inlawlawag ni Market Superintendent Alvarez nga adda ti maysa a vendor a nagturong iti opisinada tapno iberipikarna ti resibo.
Ditoyen a naduktalan a ti gatad a nakasurat iti original copy ti resibo ket nangatngato nu idilig iti nakasurat iti duplicate ken iti triplicate copies.
Maibasar met iti imbestigasyon ti Baguio City Police Office, napaneknekan nga adda ti syndicated collections nga ipatpatungpal dagiti uppat a revenue collectors kas maibasar iti ebidensiya a naala manipud kadagiti kustomer nga inaldaw nga agdeldeliver iti merkado publiko.
Kabayatanna, agtalek ni Mayor Magalong a nasurok sangapulon a tawen a mapaspasamak ti receipt padding nu sadino iti patta-patta dagitoy ket saan a bumaba iti P50-M ti napukaw a market collection.
Impanamnama ni Mayor Magalong a mapilaan iti kapada a kaso dagiti daduma pay a revenue collector, supervisor, assistant supervisor ken retirado nga opisyal ti public market iti kanito a mapaneknekan a karaman dagitoy iti nasao nga aramid.