Pakabuklan a nasurok Php387million ti gatad dagiti nagduduma nga iligal a droga a nakumpiskar dagiti otoridad bayat ti insayangkat dagitoy nga operasyon nanipod May 6 agingga May 7 ita a tawen.
Pakairamanam daytoy ti nadiskubre a 1,692,360 a pidaso ti fully grown marijuana plants, 391,000 a gramo ti dried marijuana leaves with fruiting tops, ken 1,200 a piraso ti marijuana seedlings kabayatan ti naisyangkat a marijuana eradication operation iti nasao a lawas nu sadino, Php385,400,000 ti pakabuklan a balor dagitoy.
Malaksid iti dayta, nakumpiskar metlaeng ti pakabukalan a 323.65 a gramo ti shabu ken 55ml ti marijuana oil nga addaan met ti Standard Drug Price a Php2,203,570.
Mainaig iti dayta, onse(11) met a suspect ti naaarestar kadagiti dose(12) nga operasyon nga impatungpal dagiti nagtitipon a pwersa ti kameng ti Police Regional Office Cordillera.
Maibasar iti rekord ti Regional Operations Division, uppat(4) a drug personalities ti inarestar dagiti kameng ti Baguio City Police Office, tallo(3) iti Kalinga Police Provincial Office, ken saggaysa iti Police Provincial Office ti Abra, Apayao, Benguet,ken Mountain Province.
Manipod iti pakabuklan a bilang dagiti akusado, pito(7) kadakuada ket nabigbig kas Street Level Individuals bayat nga uppat(4) kadakuada ket maibilbilang kas High Value Individual.
Agpapada dagiti akusado a sumangsango iti kriminal a kaso iti panaglabsing iti RA 9165 wenno ti Comprehensive Dangerous Drugs Act of 2002.
Kabayatanna, amin met dagiti nadiskubre ken nakumpiskar a marijuana ket inuram dagiti otoridad kasaruno ti panakaipatungpal ti kaskenan a dokumentasyon.
Iti agdama, manarimaan ti panakaisayangkat ti follow-up operations tapno maduktalan dagiti sabali pay a plantasyon ti nasao a mula ken tapno matiliw dagiti cultivator.
