![](https://img.bomboradyo.com/baguio/2020/08/dog-microchipping.jpg)
BAGUIO CITY – Tubtubngaren ti adu a dog owners ditoy Baguio ti ordinansa ti siudad a mangibilbilin iti kapilitan a panakaiparehistro dagiti taraken nga aso ken ti panakaikabil ti microchip kadagitoy mangrugi inton Nobyembre.
Nailanad iti petisyon a maipatungpal ti panagparehistro kadagiti taraken nga aso iti tunggal barangay ti siudad ken nasken nga agbayad dagiti dog owners iti P300 ken mairaman ditoy ti microchipping dagiti aso.
Impetteng dagiti dog owners iti online petition dagitoy a nasken a maamyendaran ti nasao nga ordinansa gaputa napeggad wenno narisgo iti salun-at kadagiti taraken nga aso ti microchipping.
Dinakamat metlaeng ti petisyon a ti ordinansa ket panaglabsing iti karbengan ti dog owner nga agdesisyon no anya ti kasayaatan para iti taraken daytoy.
Innayonna a ti panagpa-microchip kadagiti aso ket maibilang a kinaranggas ken saan metlaeng daytoy a makatulong iti panakaprebentar ti dognapping ken iti panagwalang dagiti aso kadagiti kalsada.
Inyunay-unayda a nasken a BOLONTARYO ken LIBRE ti panagpa-microchip kadagiti taraken nga aso ken saan a rumbeng a KAPILITAN.
Sigun pay kadagiti nasao a dog owners, responsibilidad ti City Veterinary Office a mang-kontrol ken mang-impound kadagiti aso ken mangipasigurado a natalged dagiti kalsada manipud kadagiti walang nga aso.
Binigbigda met a responsibilidad ti tunggal agtagikua iti aso a mangitali kadagiti tarakenda wenno mangipasigurado a saan dagitoy nga agwalang-walang kadagiti kalsada.