Nangiruar iti statement ti organizer ti Panagbenga Festival a Baguio Flower Festival Foundation Inc. seknan iti isyu ti artificial turf a naikabil iti sumagmamano a paset ti Melvin Jones Grand Stand.
Sigun kenni (BFFFI) Executive Committee Chairperson Anthony de Leon, ammoda ken bigbigbigenda ti pakaseknan dagiti performers, pagadalan, pamilya, tattao iti siudad ken iti rehion Cordillera seknan iti artificial turf a naaramat bayat ti Grand Street Dance Parade.
Innayon daytoy nga awatenna ti responsibilidad ken nagkiddaw iti dispensar kadagiti estudiante, mannursuro, trainers, ken contingents a nakapadas iti ut-ot, pannakadangran, ken pannakariribuk gapu iti nasao nga artificial turf.
Sigun kenni de Leon, panggepda a mapasayaat ti performance area gaputa naobserbaranda kadagiti napalabas a tawen a natapok, nabato ken napudot ti Melvin Jones Ground.
Nupay kasta, nagresulta daytoy iti pannakadangran ken dadduma pay.
Gapu iti dayta, mannarimaan ti pannakikoordinar ti nasao nga organisasyon kadagiti pagadalan ken contigent leaders tapno mangipaayda iti dokumentasyon para iti pannakaipaay ti umno a tulong ken dadduma pay.
Kabayatanna, inyunay-unay ni de Leon a saan a basol ti Committee for the Street Dance Parade ken dagiti nagpabuya ti nasao a pasamak.
Impeksa daytoy a ti Panagbenga ket para kadagiti tattao ken nangngeganda dagiti pakaseknan dagitoy. //mp4
