BAGUIO CITY – Napilaan ti kaso a theft ken trespassing ti maysa a babae kalpasan a maatap a sinerrekna ken tinakawna ti P242-K ti gatadna nga alikamen iti maysa a unit iti Baguio City.
Nabigbig ti suspek a ni Ruth Brendyl Mae Ansena, caretaker ken residente ti Manuel Roxas, Baguio City bayat a ti biktima ket ni Lorenzo Mendoza, 52-anyos, negosyante ken residente ti Quiapo Manila.
Maibasar iti report ti BCPO Station 3, nagrenta ti biktima ti maysa a unit sadiay Barangay Manuel Roxas a bambantayan mismo ti suspek gaputa adda iti ballasiw-taaw ti akin kukua.
Nupay kasta, idi imbaon ti biktima ti trabahadorna tapno apanna alaen ti alikamenna iti nasao a unit ngem naduktalan a nasukatan ti podlock ti ruangan.
Patien ti biktima nga aramid daytoy ti caretaker.
Sigun pay iti biktima, nagbayad daytoy ti renta babaen iti bank transaction.
Karaman kadagiti nginginaen nga alikamen a natakaw ket ti dua bag nga aggatad ti P90-K; dua a wallet nga aggatad ti P67-K ken laptop nga aggatad ti P85-K.//RK Bantiding
