BAGUIO CITY – Impaulog ti Baguio City Police Office (BCPO) ti maysa a memorandum kadagiti amin nga istasyon ti pulisya ditoy siudad a mangimanmandato iti kanayon a panagaramat dagiti pulis iti protective ballistic vests wenno bulletproof vests ken helmet.
Sigun kenni PMaj. Marlo Evasco, dadaulo ti BCPO-Station 7, naipaulog ti pammilin kasaruno ti insidente sadiay Parañaque a nangpaltogan ti riding-in-tandem iti dua a pulis bayat nga agipatpatungpal dagitoy iti curfew iti Barangay Baclaran.
Kinunana nga ipalpalagip ni City Director PCol. Allen Rae Co ti standard operating protocol dagiti pulis a panagaramat ti protective ballistic vest ken helmet iti kanito nga agpatrolyada tapnu maliklikan ti kapada nga insidente.
Nupay kasta, inaklonna a saan nga amin a pulis ditoy siudad ket naipaayan iti nasao a kagawaan gaputa dagiti laeng personnel ti City Mobile Force Company ken sumagmamano a personnel ti nagduduma nga istasyon ti BCPO.
Dinakamatna a gapu iti daytoy ket addan ti programa ti pulisya para iti panakaipaay dagiti nasao a kagawaan kadagiti amin a pulis.
Innayonna a mandatory ita a naka-ballistic vest ken helmet dagiti mangidaulo ken dagiti mangisayangkat ti mobile ken foot patrol malaksid a naksen nga imet dagiti pulis ti paltogda tapnu adda ti aramatenda no adda dagiti saan a mapakadaan nga insidente.
