BAGUIO CITY – Napintas ti panaglukat ti klase iti siudad ti Baguio ken probinsiya ti Benguet idi Hulyo 29, iti agdama a tawen.
Daytoy ti kinuna ni Edgar Madlaing, Chief of Field Technical Assistance Division iti Department of Education – Cordillera.
Iti interview ti Bombo Radyo kenkuana, awanen ti double-shift wenno mamindua nga agklase iti maysa nga skwelaan gapu ta dagus a naipaayan ti remedyo ti kinakurang ti classrooms.
Innayona pay a manarimaan a matartarimaan dagiti sumagmamano a pagadalan a nadadael iti panagdalapos ti bagyo a Carina ken ti Habagat babaen iti panagtitinnulong dagiti pagadalan, stakeholders ken paryentes.
Kabayatanna, kinuna ni Madlaing a bimmaba ti bilang dagiti estudyante a nag-enroll iti agdama a tawen a dumanon iti 389,524 nu idilig iti 438,103 enrollees idi napan a tawen.
Iti nasao a bilang, kaadwan a bimmaba ti bilang dagiti enrolles iti elementarya partikular iti kindergarten, posible a gapu daytoy iti maipatpatungpal a family planning.
Kinuna ni Madlaing a mabalin nga agakseptar ti late enrollees agingga inton Setyembre ngem impaganetgetna a saan kuma nga urayen ti nasao a bulan ken i-enroll dagiti annak ita a lawas.
Mainaig iti dayta, impeksa ni Madlaing nga awan ti polisiya dagitoy seknan iti panakaipaay/panagdawat ti fee ken boluntaryo laeng daytoy laketdi kayat dagiti nagannak a tumulong.
Inlawlawagna nga iti public school ket saan a mabalin a saan a maakseptar dagiti learners gapu laeng iti saan a panagbayad iti obligasyonna iti skwelaan.
