BAGUIO CITY – Rugrugianen ti City Tourism Office ken dadduma a maseknan nga opisina iti lokal a gobyerno ti Baguio ti panagplano para kadagiti aktibidad a maisayangat iti siudad iti BER Months.
Iti panakiuman ti Bombo Radyo Baguio, kinuna ni City Supervising Tourism Operations Officer, Engr. Alec Mapalo a karaman kadagiti kangrunaan a tutukan dagitoy ket ti Baguio Creative Festival iti bulan ti Nobyembre.
Tarigagayda metlaeng ti panakaisayangkat latta ti panakapasilaw ti Giant Christmas Tree iti Upper Session Road.
Nupay kasta, kinuna ni Engr. Mapalo a kasapulan latta ti panagannad tapnu masurot ti minimum public health standards kontra iti COVID-19.
Inaklonna nga adda dagiti pagbaliwan dagiti maisagsagana a plano gapu iti agbaliw-baliw a sitwasyon ti siudad gapu iti agdama a pandemya.
Kagiddan iti daytoy, kiniddawna ti tulong dagiti umili iti lokalidad iti panakaituloy ti panagrekober ti ekonomiya ti siudad babaen iti panaggatangda kadagiti produkto iti lokalidad, nangruna ta narugian manen ti sunday showcase iti Session Road.
Kinunana a dakkel a makatulong iti panagrekober ti ekonomiya ti lokal a gobyerno dagiti babassit a negosyante nga agilaklako iti market encounter.
Nupay kasta, kiniddawna met ti panagtungpal latta iti health protocols kontra iti COVID-19 kabayatan ti panagsarungkar iti nasao a showcase.
