BAGUIO CITY – Agsubli ditoy Baguio inton Setyembre ti grupo ti traffic experts manipud iti Metro Manila Development Authority (MMDA) nga immunan a nagturong ditoy siudad para iti panakaisayangkat ti scientific study iti agdama a kasasaad ti trapiko ditoy lokalidad.
Sigun kenni Mayor Benjamin Magalong, inton Setyembre ket naan-anayen nga isayangkat ti nasao a grupo ti panagadalda iti sasaaden ti trapiko iti entero a siudad.
Dinakamatna nga iti assessment ken evaluation dagiti nasao a traffic experts ket saan a napintas ti bulan ti Hulyo para iti panagalada ti datus gapu iti saan pay a narugian a serrek kadagiti pagadalan.
Inlawlawagna nga inton Setyembre ket nangrugin ti serrek iti amin a lebel ken umado metten dagiti turista a mangitunda iti panaka-ala ti pudpudno a traffic data a maaramat met iti traffic simulation software ti MMDA para iti panagadal.
Innayonna a ditoy metten a mabukel ti kaskenan a rekomendasyon para iti naan-anay a panakaisimpa ti parikut iti trapiko ditoy siudad.
Immuna metten a binigbig ti MMDA ti 15 a disso iti siudad a pakapaspasaran ti nailet a trapiko a posible a matutukan iti masungad a panagadal dagitoy.
