BAGUIO CITY – Posible a maisardeng dagiti maisaysayangkat a pro-democracy rally saday Thailand no ipatungpal ti gobyerno sadiay ti curfew a sarunuen ti panakaideklara ti martial law.
Inwaragawag daytoy ni Bombo International Correspondent Joe Smith Medina, mays a paralegal specialist iti maysa a law firm sadiay Bangkok, Thailand iti panakiyuman ti Bombo Radyo Baguio.
Kinunana a paglintegan ti Thailand a kalpasan a maideklara ti state of emergency ket sumaruno a maipatungpal ti curfew a mangikalikagum iti nasapa a panagawid dagiti tattao sakbay ti alas-dies ti rabii.
Sigun kenkuana, ur-urayenda laengen ti maipaulog a pammilin iti nasao a curfew.
Dinakamatna a manamnama ti panakaisayangkat ti tignay protesta sadiay Bangkok kadagiti sumarsaruno pay a bulan kas maibasar iti waragawag ti utek wenno dadaulo ti panagtinay-protesta sadiay.
Inlawlawagna a saan nga innaldaw ti panagprotesta sadiay Bangkok ngem ketdi, dua agingga tallo laeng iti binulan ken maisaysayangkat daytoy iti dua laeng a distrito ti Bangkok.
Sigun kenni Medina, nasayaat met ti panakaimaton ti Thailand ngem adda laeng dagiti minorya sadiay nga agiwarwaras ti propaganda kontra iti gobyerno.
Impannakkelna pay a napintas ti trato ken adda ti maipapaay a konsiderasyon kadagiti Pilipino nga agnanaed ken agtatrabaho ita sadiay Thailand gapu iti panagbalin ti dua a Pilipinas ken Thailand a miembro ti ASEAN.
