BAGUIO CITY – Manamnama a mairugi ti panakaiyimplimintar ti Clean As You Go Ordinance iti Baguio City iti kabiitan a panawen kasaruno ti panakaaprobar daytoy iti pinal a panakaibasana itay laeng nabiit.
Iti interview ti Bombo Radyo kenni Councilor Elmer Datuin, panggep ti nasao nga orinansa nga isuro ti disiplina kadagiti indibidwal kasta met ti panangpatalinaed iti kinadalus nangruna kadagiti panganan iti siudad.
Inlawlawag ni Councilor Datuin a saan a karaman iti nasao nga ordinansa dagiti fine dining restaurants.
Kangrunaan kadagiti establishimento a sakupen ti nasao nga ordinansa dagiti babassit a panganan, ken fast food chains nu sadino mabalin a mamulta ti P500 ken agpangato dagiti matiliwan a saan nga agtulnog.
Nupay kasta, dinakamat ni Councilor Datuin a saan a kasapulan a punasan dagiti indibidwal ti lamisaan nu di ket isalansan wenno isinopda laeng dagiti nangananda sakbayda a tumalaw.
Kagiddan dayta, kinuna ti konsehal a mangipatungpalda ti massive information campaign iti kooperasyon ti City Health Office partikular ti Sanitary Department a maysa metlaeng kadagiti kangrunaan a mangiyimplimintar iti nasao nga ordinansa.
Kabayatanna, saan met a karaman iti inkapilitan a panangi-urnos kadagiti nanganan dagiti adda iti parke ken daduma pay a pagpasyaran ngem impaganetget ni Councilor Datuin nga adda ti sabali nga ordinansa para iti daytoy kas iti environmental code ti siudad.//Bombo Rob Dominguez
