BAGUIO CITY – Kiniddaw ni Mayor Benjamin Magalong ti tulong ni Chief Justice Diosdado Peralta kalpasan a kinasuan ni Judge Nelson Lago dagiti law enforcers ti siudad ti Baguio iti indirect contempt.
Iti surat nga inpatulod ni Magalong ken ni Peralta, impettengna a maysa a panagabuso iti turay ni inaramid ni Lago.
Inladawanna kas arogante ken unprofessional ni inaramid ti nasao nga ukom a nangidadanes kadagiti mangiyim-implementar iti linteg.
Kinuna pay ti mayor a no saan nga ilinteg ti Korte Suprema ti inaramid ni Lago ket maapektaran ti imahe dagiti law enforcers ti Baguio City.
Maipalagip a dua ti panaglabsing a naaramidan ni Judge Lago partikular ti iligal a panagparada ken ti panaglabsing iti number coding ordinance ti siudad.
Nagresulta daytoy iti pannakaipaay ti dua a citation ticket iti nasao nga ukom ngem kalpasan ti panaglabsingna ket nangipaulog daytoy iti subpoena kadagiti nangsitar kenkuana a traffic enforcers ken inbilinna ti panagparang dagitoy iti Korte a pagserserbianna inton Nobiembre 29.
