BAGUIO CITY – Mababbabalaw ti panangipaay ti gobierno iti pinansial a tulong kadagiti sigud a kameng ti rebelde a grupo a simmuko kadagiti otoridad.
Kasaruno pay laeng daytoy iti pannakaipaay ti pinansial a tulong iti uppat a sigud a rebelde sadiay Poblacion, Lagawe, Ifugao itay kanikadua.
Naipaayan ti maysa kadagitoy iti P90,000; nakaawat met ti maysa kadagitoy iti P100,000 bayat a ti dua ket nakaawat iti sag P10,000.
Sigun kadagiti nangipaay iti reaksion iti Bombo Radyo-Baguio, saan a maiparbeng a maipaayan iti tulong dagiti sigud a rebelde gapu ta nagbalin dagitoy a kabusor ti gobierno.
Sigun iti maysa pay a maseknan nga umili, nasken ketdi a maipangruna a maipaayan iti tulong dagiti pulis, soldado ken sibilian a nadangran kadagiti riribok nga inpatungpal dagiti rebelde.
Mamati met ti dadduma nga umili a babaen iti panangtulong ti gobierno kadagiti sigud a rebelde ket posible a maallukoy ti dadduma nga indibidual a makikappeng kadagiti rebelde ken kalpasanna ket sumuko dagitoy kadagiti otoridad tapno makagun-odda iti pinansial a tulong.
