Imbilang ti Baguio City Police Office (BCPO) kas isolated case ti pannakaikali ti na-chop-chop a bagi ti police officer iti ancestral house a tagikua metlaeng ti maysa nga opisyal ti PNP idiay Pucsusan, Mines View, Baguio City.
Iti pannakiuman ti Bombo Radyo, kinuna ni Police Major Marcy Marron, Information Officer ti Baguio City Police Office, iti baet ti napasamak a krimen ket saan a rumbeng a pagbutngan dagiti pulis agsipud ta ado kadakuada ti nasasayaat.
Maipalagip nga idi Disyembre 5 ket narekober dagiti otoridad iti bakante a lote ti nakasako a bagi ni Police Executive Master Sergeant (PMES) Emmanuel De, 55-anyos, nakadestino iti Puerto Princesa Police Provincial Office ken residente ti Purok Magalang, Sta. Monica, Puerto Princesa City, Palawan.
Immuna metten a nabigbig ti suspek a ni Police Lieutenant Colonel Roderick Pascua, 45-anyos, residente ti Taguig City ken nakadestino iti DCADD, EPD.
Maibasar iti report ti Taguig City Police Station, naireport iti opisinada a mapukpukaw ni PMES De Asis.
Gapu iti daytoy, nag-imbestigar dagiti otoridad nu sadino maibasar iti phone tracking application, naudi a nakita ni PMES De Asis iti maysa a motel idiay Lower Bicutan, Taguig City.
Iti panagtultuloy ti imbestigasyon, nakita iti CCTV footage, alas otso ti rabii idi Nobyembre 28, 2024, nagcheck-in ti biktima iti maysa a motel ngem idi 8:30 pm iti nasao metlaeng nga aldaw ket nakita a rimwar ken naglugan iti grab taxi paturong iti Camp Bagong Diwa National Capital Regional Police Office.
Iti CCTV footage, nakita ti biktima kadwana ti maysa a babai a nabigbig a ni Police Executive Master Sergeant (PMES) Rosemarie Pascua, 44-anyos, asawa ti suspek a ni PLTCOL. Roderick Pascua,
nakadestino iti Regional Mobile Force Battalion, National Capital Regional Police Office.
Nakita a nagturong da PEMS De Asis ken PEMS Pascua iti apartment idiay Camp Bagong Diwa, Bicutan, Taguig City.
Gapu kadagiti nakita a CCTV footage, napan sinapul dagiti otoridad ti biktima iti rented apartment ni PEMS Pascua para iti imbestigasyon agsipud ta daytoy ti naudi a kadwa ti biktima.
Iti panagturong dagiti otoridad iti apartment ni PEMS Pascua, nadanunnanda metlaeng ti asawana a ni PLTCOL. Pascua.
Inimbitaran dagiti otoridad dagiti agasawa iti Taguig Station Investigation and Detective Management Service (SIDMS) para iti imbestigasyon.
Saan a nagbayag ket inaklon ni PLTCOL. Pascua a pinalpaltuganna ti biktima a ni PMES De Asis gapu ta sigun kenkuana ket naabutanna ti asawana ken ti biktima iti apartment dagitoy nga addaan iti intimate relations.
Gapu iti daytoy, kinuna ti suspek a binilinna ti misisna nga agala iti hacksaw (ragadi) ken ditoy a chinop-chopna ti bagi ti biktima.
Sigun pay iti suspek, inkabilna iti sako ti nachop-chop a bagi ti biktima.
Inluganna daytoy iti ford ranger ken imbiahena paturong iti ancestral house daytoy idiay Pucsusan, Mines view, Baguio City ken ditoy nga inkalina.
Babaen met iti koordinasyon dagiti nagduduma nga awtoridad ket nakali ti agruprupsan a bangkay ti biktima iti nasao a lote.
Narekober iti nasao a lugar ti dua a sako a naikabilan ti nasina-sina a bagi ti biktima, dua a white t-shirt ken 1 chopping wooden board.
Naiturong met ti bangkay ti biktima iti Cosmopolitan Funeral Services idiay Marcos Highway nu sadino ditoy a nacriminate idi kalman, ala una ti malem sakbay a naibiahe idiay Manila.
Iti kaudian a report ket adda ti suspek iti kustodiya ti Taguig City Police Station bayat ti agtultuloy nga imbestigasion dagiti otoridad.
