Balligi a naipatungpal ti tree planting activity ti Baguio Correspondents and Broadcasting Club (BCBC) no sadino panggepna a maisurwan dagiti ubbing iti siudad ti Baguio itay agsapa sadiay Busol Watershed iti siudad.
Iti pannakiuman ti Bombo kenni Dionisio Dennis, Presidente ti Baguio Correspondents and Broadcasting Club (BCBC), kinunana a dumanon iti 150 a pine tree sapling ti inmula dagitoy.
Kinunana a daytoy ket para metlaeng iti pannakalagip kadagiti pimmusay ken dagiti immun-una a grupo.
Malaksid iti dayta, daytoy ket paset metlaeng ti selebrasyon ti maika-61st nga anibersaryo dagitoy ken revival daytoy ti Eco- Walk tradition dagitoy.
Kabayatanna, inlawlawag ni Joel Arthur Tibaldo, maysa kadagiti beterano a ti Eco-Walk ket nabukel idi tawen 1992.
Kinunana a daytoy a programa ket tapnu maipromote ti environkental awareness kadagiti ubbing.
Impettengna pay a sigud nga adda ti maipatpatungpal a seminars, art acitivites ken dadduma pay.
Kagiddan dayta, nagyaman ni Melody Liaban, Forest Technician 2 iti CENRO-Baguio iti inisyatiba ken suporta para iti pagimbagan ti aglawlaw tapno maliklikan ti climate change.
Innayonna pay a babaen kadagiti tree planting nga ipatpatungpal dagiti nagduduma nga organisasyon wenno grupo ket dakkel ti tulong para iti pannakasalwad ti kabanbantayan iti siudad ti Baguio.//Bombo Noveh Organo
