BAGUIO CITY – Manamnama a bumaba ti presyo dagiti cutflowers iti 50% mangrugi inton Nobyembre 10 kalpasan ti panakalagip ti All Saints Day ken All Souls Day.
Nupay kasta, manamnama a ngumato manen ti presyo inton Nobyembre 25 agingga inton Disyembre.
Iti interview ti Bombo Radyo kenni Andy Colte – cutflower grower, napintas ti panag-apit ken panaglako dagitoy kadagiti sabong kadagiti naglabas nga aldaw.
Dinakamatna a dagiti naapitda a sabong itay nabiit ket nasangbotna ti nangina a presyo bayat a dagiti dadduma ket saan a nakasangbot gapu iti napasaran a nepnep idi maudi a lawas ti Setyembre.
Iti baet daytoy, nagyaman met dagiti local farmers gapu ta uray nabagyo dagiti greenhouse da ket nakasubbot latta dagitoy iti nangina a presyo.
Inaklon met ni Colte nga agtaltalinaed nga apektado dagiti cutflower growers kadagiti imported a sabong manipud iti dadduma a pagilian.
Imbinglayna a kaadoan latta a pagtataudan ti suplay ti sabong iti pagilian ket manipud iti probinsiya ti Benguet.
Karaman kadagiti mangsupsuplay ti sabong iti pagilian ket ti Bukidnon, Mindanao, Tagaytay ken Bataan.
Iti agdama ket plano met ti probinsiya ti Kalinga nga agmula ti sabong.//Bombo Rosemarie Bulsao
