Agtultuloy ti panagmonitor dagiti kameng ti Department of Trade and Industry(DTI)-Cordillera kadagiti agdama a presyo ken suplay dagiti basic necessities kasaruno ti panakaideklara ti state of calamity sadiay Mayoyao, Ifugao gapu iti mapaspasaran nga epekto ti El Niño phenomenon.
Iti panakiuman ti Bombo Radyo kenni Jeremias Agpes, chief ti Consumer Protection Division ti Department of Trade and Industry-Cordillera, daytoy ti umuna a gundaway a naipasidong ti nasao a munisipalidad iti state of calamity gapu iti El Niño.
Sigun kenni Agpes,adda ti dua nga establishimento a naduktalanda a nangipangato ti presyoda iti baet ti krisis a mapaspasaran.
Nupay kasta, inlawlawag ni Agpes a kinasapulan dagiti agtagikua kadagiti nasao nga establishimento ti agi-adjust kadagiti presyo ti lakoda gapu ta nangatngato metlaeng ti presyo a nakalanad kadagiti imprisinta dagitoy a purchase documents.
Maibasar iti monitoring ti nasao nga opisina,stable paylaeng ti presyo dagiti gagatangen kadagiti nagduduma nga establishimento kasta met nga umdas pay ti suplay dagitoy.
Innayon ti opisyal a saan laeng a tunggal adda maipasidong iti state of calamity a mangipatpatungpal dagitoy ti price monitoring nu di ket agmonmonitor metlaeng dagitoy iti tunggal lawas iti Baguio City bayat a binulan met kadagiti daduma pay a paset ti rehion.
Kabayatanna, maysa met a karit para kadakuada ti mapan agmonitor kadagiti nasusulinek wenno adayo a lugar gapu ta limitado laeng ti bilang dagiti personel a mangipatungpal iti monitoring rason a kasapulan dagitoy ti makikoordinar kadagiti provincial offices, ken local government units.//Bombo Rob Dominguez
