BAGUIO CITY – Agtultuloy ti programa nga isaysayangkat ti Baguio City Jail Female Dorm tapno matulongan dagiti Persons Deprived of Liberty a naibalud gapu iti iligal a droga.
Iti pannakiuman ni Bombo Jez Lapizar kenni Jail Inspector Joan Bacayan, Acting Warden ti Baguio City Jail Female Dorm, kinunana nga adu dagiti programa ti Bureau of Jail Management and Penology tapno maiyadayo dagiti Persons Deprived of Liberty iti ilegal a droga pakairamanan dagiti symposium, ken maisaysayangkat a greyhound operation wenno ti panagsukimat kadagiti usar dagitoy.
Daytoy ket tapno maipasigurado nga awan ti maiserrek wenno mailemmeng nga ilegal a droga iti uneg ti pagbaludan.
Malaksid iti greyhound operation nga isaysayangkat ti Philippine Drug Enforcement Agency – Cordillera, mangisaysayangkat dagiti personnels ti pagbaludan iti bukodda a greyhound operation iti mamintallo a daras tunggal aldaw.
Malaksid iti dayta, adda met laeng ti programa a maaw-awagan a Katatagan, Kalusugan at Damayan ng Komunidad (KKDK), daytoy ket rehabilitation ken therapeutic program kadagiti Persons Who Used Drugs nga adda iti uneg ti pagbaludan.
Kabayatanna, naka-enroll ti siyam a balud iti Katatagan, Kalusugan at Damayan ng Komunidad program nu sadino maipasidong dagitoy iti programa nga addaan ti 18 modules iti uneg ti innem a bulan.
Iti sabali a bangir, maitulod dagiti mawaya-wayaan a balud kadagiti pamilya-da ken mabantayan dagitoy babaen kadagiti baragay officials.
Daytoy ket tapno maipasigurado a saanda nga agsubli manen iti panagaramat ti iligal a droga.
Iti agdama, pitopulo ket uppat a Persons Deprived of Liberty ti nakabalud iti nasao a pagbaludan nu sadino uppat a pulo ket maysa kadagitoy ket naibalud gapu iti iligal a drogra.
