BAGUIO CITY – Mangnamnama latta dagiti responders a masarakan ti maysa a maudi a biktima ti Banaue Mudslide sadiay Sumigar, Viewpoint, Banaue, Ifugao.
Sigun ken ni Banaue Mayor Wesley Dulawan, negatibo ti resulta ti naipatungpal a search and retrieval operation idi kalman.
Nupay kasta, kinunana a nasarakanda ti cellphone ti maysa kadagiti biktima iti ground zero ken maisubli daytoy iti pamiliana.
Kinunana a maituloy ti panagsapul ita nga aldaw, Nobiembre 20, babaen iti lima a dadakkel a composite teams manipud Sumigar aginggat Magat Dam.
Immunan a kinuna ti mayor a nanayonan dagiti kameng ti composite teams a mangsapsapul iti maysa kadagiti biktima.
Impanamnama ni Mayor Dulawan a saan latta a mapukaw ti namnama dagitoy a masarakan ti biktima.
Nagyaman ti mayor iti anus ken sakripisio dagiti searchers ken support teams.
Maipalagip nga immunan a nasarakan dagiti responders ti bangkay ti siam a biktima ken ita ket maysa laengen ti mabirbirok.
Binigbig met ti DPWH ti sakripisio nga inpaay ti lima a kameng ti ahensia a karaman kadagiti biktima.
