BAGUIO CITY – Adu latta dagiti meat vendors iti Baguio City Public Market ti saan nga agtungtungpal kadagiti naipaulog a pagalagadan kas iti umno a panagilako dagitoy iti karne.
Inaklon daytoy ni Bong Alvar, maysa a panakabagi dagiti meat vendors iti merkado publiko ti Baguio City iti panakiuman ti Bombo Radyo Baguio kalpasan a nadamag ti reaksionna iti naipasa a City Ordinance a nakailanadan dagiti standards a nasken a tungpalen dagiti amin a meat vendors ken meat dealers iti Baguio City Public Market, kadagiti satellite markets, retail stores wenno supermarkets iti masakupan ti siudad.
Sigun kenkuana, agtungtungpalda met kadagiti pagalagadan iti umno a panagilako ti karne ngem adu kadagiti kakadwada iti merkado ti aglablabsing kadagiti pagaladagan kas iti kinadalus ti pwesto ken dagiti agilaklako ken dagiti saan nga umno a kagawaan.
Nupay inaklonna a marigatanda nga agtungpal iti maikalkalikagum a plastic chopping board dagitoy gaputa awan ti paggatanganda a supplier, inyunay-unayna nga iti pwestoda ket innaldaw ti panangdalusda iti kayo a chopping board dagitoy.
Kinunana pay a tunggal agtaripnong dagiti meat vendors iti merkado ket kanayonda nga ipalagip kadagiti kakadwada ti innaldaw a panagdalus dagitoy, sakbay ken kalpasan ti panaglakoda tapnu nadalus ken napintas ti masakupan ti pwesto dagitoy.
Irekrekomendar pay ni Alvar ti innaldaw a panag-inspeksion ti City Market Superintendent kadagiti pwesto iti meat section tapnu amin dagiti makita a saan nga agdaldalus ket mamulta wenno saan ket masuspindir ti business permit tapnu agnakem dagitoy.
Impettengna a no mabaybay-an dagiti saan nga agtungtungpal kadagiti paglintegan ket mairwam ken saanda a talaga nga agdalus iti pwestoda.
Sigun pay kenkuana, nasken a nainget ti implementasyon ti baro nga ordinansa ken saan laeng a ningas-cogon wenno para iti publicity.
Pabor metlaeng ni Alvar iti market development tapnu maisimpan dagiti pakaseknan iti merkado publiko ken agbalin dagitoy a competitive iti dadduma pay a merkado.
