Naipinalen ti security plans para iti panakaipatungpal iti 2024 Bar Examinations idiay Saint Louis University, Baguio City inton bigat, inton September 11, ken inton September 15.
Daytoy ket babaen iti taripnong a naangay idiay Baguio City Police Office Kapanalig Hall idi laeng kalman babaen iti panangidaulo ni Baguio City Police Office City Director Police Colonel Francisco Bulwayan Jr.
Maysa kadagiti naipangruna a natalantan ti panakaideploy dagiti kameng iti Baguio City Police Office,City Explosive and Canine Unit, Bureau of Fire Protection,Public Order and Safety Division, City Disaster Risk Reduction and Management Office,City Health Services Office,Emergency Medical Team (EMT),T.Alonzo ken ti ABCR Barangay Officials.
Malaksid iti dayta, naipangruna metlaeng a natalantan ti panakaimanihar iti gunay iti trapiko nu sadino, napagnunumwan ti drop-and-go policy para iti naannayas a panaggunay dagiti lugan asideg iti pakaangayan iti eksaminasyon.
Kabayatanna, maipatungpal met ti liquor ban 50-meter radius iti uneg iti nasao nga unibersidad mangrugi iti tengnga iti rabii sakbay iti aldaw iti eksaminasyon ken agleppas alas dies iti rabii iti metlaeng aldaw iti eksaminasyon.
Kagiddan dayta, temporaryo metlaeng a maiparit iti panaginom, panaglako, panangiwaras, wenno panangiserbi iti arak ken daduma pay nga alcoholic beverages iti aldaw iti eksaminasyon.
Impasigurado met ni PCol. Bulwayan Jr. kadagiti ag-exam ti seguridad dagitoy bayat ti eksaminasyon.
