BAGUIO CITY – Nakemmeg ti maysa a senior citizen kalpasan a binagsolna ti maysa a lalaki sadiay Calantiao Street, Baguio City idi kanikadua.
Nabigbig ti suspek a ni Alberto Orinion, 69-anyos, naasawaan, awanan trabaho ken residente ti Kias, Virac, Itogon, Benguet.
Nabigbig met ti biktima a ni Peter Gamilen, 49-anyos, baro, laborer ken residente ti Liteng, Pacdal, Baguio City.
Maibasar iti blotter ti pulisiya, siguden nga agam-amo ti suspek ken ti biktima ken agturturongda pay iti balay-paginuman ken pagkapian sadiay Lakandula Street ken Calantiao Street.
Naamuan nga inawis ti biktima ti suspek nga agturongda iti balay-paginuman iti umuna a gundaway ken mamindua a gundaway ngem nagkedked daytoy.
Gapu iti panagkedked ti suspek ket nakapungtot ti biktima.
Dinanog ti biktima ti suspek ngem bimmales met ti suspek ken sadiay a binagsolna ti biktima babaen iti stainless a kutsilyo.
Dagus a naiturong ti biktima iti pagagasan bayat a nakemmeg ti suspek babaen kadagiti nagresponde a pulis ken iti pammilin ni Inquest Prosecutor Maria Lourdes Soriano ket naibalud ti suspek. (with Bombo Nikki Agsiweng)
