Impanamnama ni Baguio City Councilor ken Association of Barangay Councils (ABC) President Rocky Aliping a saan a maapektaran ti panangipaay dagiti babbarangay iti serbisyo kadagiti constituents dagitoy kagiddan ti panangadaptarda iti four-day work week.
Iti panakiuman ti Bombo Radyo kenno Councilor Aliping, inlawlawagna a kasapulanda nga agtulnog iti nasao a pammilin manipod iti nasyunal a gobyerno nangruna ket nangipaay metlaeng ti Department of the Interior and Local government (DILG) iti advisory kasta metten ti executive order manipod kenni Baguio City Mayor Benjamin Magalong.
Nupay kasta,mailaksid iti pammilin dagiti daduma nga opisina.
Inlawlawag ni Councilor Aliping nga iti baet ti uppat nga aldaw nga iseserrekda iti opisina ket siguradwenda nga agtultuloy ti panakaipaay ti serbisyo kadagiti bumarangay babaen kadagiti schemes wenno pamay-an nga ipatungpal dagiti maseknan a barangay officials.
Karaman iti dayta dagiti online transactions ken panangpatalinaed nga aktibo kadagiti pangkontakan kadakuada.
Innayon ti opisyal a naibilin metlaeng kadakuada nga agingga iti mabalin ket saan a mabakantean dagiti barangay hall kabayatan ti panakaiyimplimintar ti four-day work week.//Bombo Rob Dominguez
