Nangipaulog ti Commission on Elections iti show-cause order kontra iti innem a kandidato ti kinasenador gapu iti panaglabsingda kadagiti linteg ti eleksion kadagiti campaign posters.
Dadduma gamin kadagiti material ti iligal a naikabil wenno saan nga eco-friendly, a dadduma ti nailansa pay kadagiti kayo—a rason ti panagpungtot pay kitdi ti publiko.
Gapu iti daytoy, nagbalakad ni Environmental advocate Ronald Posadas a ti panangilansa kadagiti poster kadagiti kayo ket mabalin a pakaigapuan ti panagrunot.
Impaganetget ni Comelec Chairman George Garcia a maiparit iti linteg ti eleksion dagiti nasao a wagas, ken impaganetgetna ti eco-friendly a panagkampania.
Impalagip pay ni Garcia kadagiti kandidato a dagiti posters ket kasapulan a maikabil iti naituding a lugar, ken saan a kadagiti parapubliko a pasdek wenno pagadalan.
Napakaammuan metten dagiti amin a kandidato ti kinasenador nga ikkatenda dagiti iligal a materialas, bayat a ti Department of Environment and Natural Resources (DENR) ti mangasikaso iti aniaman a panaglabsing iti linteg ti aglawlaw.
Indagadag ti Comelec kadagiti kandidato a respetuenda dagiti pagannurotan ti eleksion ken liklikan ti panangdangran kadagiti kayo iti panagreggetda iti kampania.
