BAGUIO CITY – Ituloy latta ti lokal a gobyerno ti Baguio ti plano daytoy a panangaramat iti sigud a Sto. Nino Hospital a masarakan iti P. Burgos Barangay kas critical care unit para kadagiti COVID-19 patients.
Impeksa daytoy ni Mayor Benjamin Magalong iti baet a sumangsango ita iti parikut ti plano gapu kadagiti nainget a requirements ti nasyonal a gobyerno sakbay a mapagbalin daytoy a critical care unit para kadagiti pasyente ti COVID.
Kinunana a maituloy latta ti panakaaramat ti nasao a pasilidad kas extension facility para kadagiti dialysis patients a kinaptan ti coronavirus.
Impannakkel met ni City Administrator Bonifacio Dela Peña a babaen iti tulong ti gobyerno ken ti pribado a sektor ket manamnama a mangrugi ti operasyon ti ospital inton April 14.
Dinakamatna nga adda dagiti silid a maisagsagana para kadagiti COVID patients a saan a mabaelan a maakomodar ti Baguio General Hospital and Medical Center.
