BAGUIO CITY – Nakasaganan a maipaluspos ita a bulan iti Setyembre ti Special Risk Allowance (SRA) dagiti healthcare workers iti rehiyon Cordillera.
Sigun kenni Department of Health (DOH) – Cordillera Assistant Regional Director Dr. Amelita Pangilinan, manarimaan ti validation kadagiti dokumento nga impasa dagiti healthcare workers iti rehiyon tapnu maipaayanda ti SRA.
Kinunana nga adda ti nabati a P38-M a pondo manipod iti Bayanihan Fund a saan a naaramat idi napalabas a bulan nga isut maiwaras kadagiti maikari a healthcare workers.
Inlawlawagna a sakbay a maiwaras ti allowances dagiti healthcare workers ket nasken nga iberipikar pay ti ahensia ti nagan dagitoy pakairamanan dagiti dokumento nga insubmitir dagitoy kas iti Memorandum of Agreement nga addaan ti pirma ti gobernador ti probinsia a nakadestinuanda ken dagiti dadaulo ti pasilidad a pagsirsirbianda.
Innayonna a nasken nga addaan dagiti benipisaryo ti sertipikasyon a mangpaneknek a nagtrabaho dagitoy kas healthcare worker ita a pandemya.
Dinakamat pay ni Dr. Pangilinan a manmanma iti panakaipaay ti maikadua a dupag ti SRA gapu ta adda ti kanayunan a P26-M a pondo a naituding a maipaay kadagiti dadduma pay a healthcare workers.
