Temporaryo a maiparekep dagiti sumagmamano a kalsada iti vehicular traffic kagiddan ti pannakarambak dagiti sumagmamano nga aktibidad iti siudad ti Baguio inton bigat.
Dagiti kangrunaan nga aktibidad ket ti lighting wenno pannakasindi ti Christmas tree iti Session Road, SLU Lantern Parade, dagiti sumagmamano a performances ti SLU Symphonic Band ken dadduma pay.
Gapu iti dayta, temporaryo a maiparekep ti both lanes iti Session Road no sadino mangrugi daytoy iti alas otso y media (8:30) iti agsapa agingga iti alas syete y media (7:30) iti rabii.
Malaksid iti dayta, maiparekep metlaeng ti kalsada idiay North Drive, Post Office Loop, Magsaysay Avenue Intersection, Harrison Road, Jose Abad Santos Drive ken Lake Drive mangrugi iti oras ti alas tres y media (3:30) iti malem agingga iti alas syete y media (7:30) iti rabii wenno agingga nga agawid dagiti parade participants ken dagiti nagbuya iti Melvin Jones.
Daytoy ket kas maitunos iti Executive Order No. 126, Series of 2024.
Kabayatanna, maal-allukoy met ti publiko a makipaset iti daytoy tapno maimatangan met dagiti nagduduma a maipabuya.
