BAGUIO CITY – Manamnama a manayonan ti bilang dagiti turista a mangbuya iti maikatlo a selebrasyon ti Cordillera Festival of Festivals inton Oktubre 18 iti agdama a tawen.
Daytoy ket paset ti selebrasyon ti National Indigenous Month.
Ti nasao nga aktibidad ket pakipasetan dagiti nagduduma a Festival iti Cordillera kas iti Kawayan Festival ti Abra, Say-am Festival ti Apayao, Adivay Festival ti Benguet, Panagbenga Festival ti Baguio City, Kulpi Ad Festival ti Ifugao, Bodong Festival ti Kalinga, Matagoan Festival ti Tabuk City, ken Lang-ay Festival ti Mt. Province.
Iti pannakiuman ti Bombo Radyo ken Atty. Reynald Lacaden, Senior Tourism Operations Officer ti Department of Tourism – Cordillera, panggep ti selebrasyon nga ipaam-ammo iti publiko dagiti dadduma pay a kultura ken naisangsangayan a piesta ti rehion.
Innayonna a babaen iti daytoy ket maitandudo ti turismo ti Cordillera.
Immuna nga imbinglay ni Anthony De Leon, General Manager ti Baguio Country Club ken Presidente ti Hotel and Restaurant Association of Baguio a bimmassit ti bilang dagiti turista a nagpasyar iti Summer Capital of the Philippines kadagiti napalabas a bulan.
Gapu iti daytoy, kinunana a nasken nga agaramidda ti estratehiya a mang-allukoy manen kadagiti turista a bumisita iti siudad.
Maipalagip a naangay ti umuna a Cordillera Festival of Festivals idi tawen 2022 tapno maitandudo ti turismo iti rehiyon ken manamnama a marambakan daytoy tunggal tawen.
Iti daytoy a bulan, manamnama ti kaadda da Christina Garcia Frasco, Secretary ti Department of Tourism ken ni Victorino “Ino” Mapa Manalo, Chairman ti National Commission for Culture and the Arts.
