BAGUIO CITY – Nabigbigen ti lalaki a pimmusay kalpasan a naitama ti ulona iti agdan kalpasan a natnag idi dinanog ti maysa a lalaki ditoy Baguio City.
Nabigbig daytoy a ni Colin Choyao Akingchan, 47-anyos, baro, construction worker, tubo ti Barlig, Mountain Provice ken residente ti Kadaclan Village, Baguio City.
Binigbig daytoy ti mismo a kabsatna a ni Ulysis Akingchan.
Agtultuloy met latta ti imbestigasyon dagiti pulis iti panangdangran a nangitunda iti ipupusay ti biktima.
Maipalagip a napasamak ti insidente iti overpass sadiay Magsaysay Avenue.
Manarimaan pay ti panagala dagiti pulis kadagiti kanayonan a CCTV video footage para iti pakabigbigan dagiti suspek.
Umap-apela ti Baguio City Police Office – Station 7 kadagiti umili a makitinnulongda iti panakabigbig ken panakakemmeg ti suspek.
Maibasar iti blotter ti pulisya, insalaysay ti testigo a ni Rachel Tumaak a sarsarunuenna ti biktima iti panagsalogna iti agdan ti overpass sadiay iti Magsaysay Avenue.
Nasabat da ti maysa a grupo ti lallaki kabayatan iti panagsalogda.
Killaat a dinanog ti maysa kadagiti lalaki ti biktima a nagresulta iti panakatnag ken panakaitama ti ulo daytoy iti agdan.
Naduktalan a nagsagrap ti biktima iti traumatic brain injury ken severe multiple scalp fracture a nangitunda iti ipupusay daytoy. (-Bombo Maureen Bassit / Bombo Brigitte Marcasi)
