BAGUIO CITY – Sumangsango iti kaso a panaglabsing ti RA 9165 wenno Comprehensive Dangerous Drugs Act of 2002 ti maysa a vegetable trader iti insayangkat dagiti otoridad a buy bust operation sadiay Lower Quirino Hill, Baguio City idi kalman.
Nabigbig daytoy a ni John Patrick Dalumpines Lozano alyas MASTER, 26-anyos, tubo ti Lanao del Norte, Mindanao ken residente ditoy siudad.
Ti pannakakemmeg ti suspek ket resulta ti follow-up operation nga inkoordinar ti La Trinidad Municipal Police Station iti Benguet Innfantry Batallion ken dadduma pay nga operatiba.
Nakumpiskar manipud kenkuana ti tallo a gramo ti mapapati a shabu nga aggatad iti P3,000 babaen iti pulis a nagserbi kas buyer daytoy.
Naala pay manipud kenni Lozano ti buy-bust money ken ti cellphone a naaramat iti transaksion.
Nakapilan iti korte ti kaso a maipila kontra iti suspek.
