BAGUIO CITY – Sumangsango iti kaso a panaglabsing iti Republic Act 9165 wenno Comprehensive Dangerous Drugs Act of 2002 ti 26-anyos a lalaki kalpasan a natiliw iti buy-bust operation nga insayangkat ti Provincial Drug Enforcement Agency – Benguet idiay Tojanap Viewdeck, Poblacion, Bokod, Benguet idi kalman, Agosto 27, iti agdama a tawen.
Ti suspek ket construction worker ken residente ti Engineers Hill, Baguio City.
Nakumpiskar manipud iti suspek ti pakete ti maatap a shbu nga agdagsen iti 3.38 grams ken mapatta-patta nga agbalor iti P22,984.
Naala metlaeng kenkuana ti maysa a pidaso ti P1,000 bill, sangapulo ket pito a pidaso ti P1,000 boodle money, motorsiklo ken daduma pay nga alikamen a naaramat iti nasao a transaksyon.
Iti exclusive interview ti Bombo Radyo kenni PDEU-Benguet Chief PCapt. Jeremias Toyokan, agideldeliver ken aglaklako ti suspek iti iligal a droga idiay Bokod, Kabayan, Buguias ken siudad ti Baguio.
Sigun met iti suspek, naaramidna ti nasao nga agilako ti shabu gapu ta ‘gipit’ ken kasapulanna ti kwarta gapu ta masikog ti asawana.
Iti agdama, adda ti suspek iti kustodiya ti La Trinidad Municipal Jail bayat a maur-uray ti inquest proceeding manipod iti korte.
