BAGUIO CITY – Naipilan ti tallo a kaso kontra iti 33-anyos nga akusado a nangpaltog iti tengnged ti 28-anyos a live-in partnerna idiay Barangay Bakakeng Sur, Baguio City idi Hulyo 7, iti agdama a tawen.
Dagiti kaso ket panaglabsing iti Republic Act 10591 wenno Comprehensive Firearms and Ammunition Regulation Act; Republic Act 9262 wenno Anti-Violence Against Women and Their Children Act; ken Republic Act 9165 wenno Comprehensive Dangerous Drugs Act of 2002.
Natiliw ti akusado babaen iti nainget a manhunt operation nga impatungpal dagiti maseknan nga operatiba idiay Km. 3, Marcos Highway, Bakakeng Central, Baguio City idi Agosto 13.
Maipalagip a pinaltoganna ti live-in partnerna gapu iti maatap a panagselos.
Intarayna met daytoy iti Baguio General Hospital and Medical Center (BGHMC) ngem dagus a pimmanaw.
Nagsagrap ti biktima ti Neck Fracture a nangitunda iti Severe Spinal Cord Injury.
Kabayatanna, kinumpirmar ti Regional Civil Security Unit-Cordillera Administrative Region (RCSU-CAR) a ti akusado ket saan a licensed firearm holder.
Ad-adda pay a naduktalan iti imbestigasyon a ti akusado ket mabigbigbig kas high-value individual (HVI) iti Philippine Drug Enforcement Agency (PDEA) regional watchlist.
Dagus met nga inserbi ti Baguio City Police Office – Police Station 10 ti warrant of arrest nu sadino ditoy a naduktalan ti tallo a pakete ti maatap a shabu ken marijuana leaves, ken dua a weed grinders iti ikotna.//Bombo Jez Lapizar & Marinel Rodrigo
