BAGUIO CITY – Ngimmato ti presyo ti nagduduma nga ikan a mailaklako iti merkado publiko ditoy siudad ti Baguio.
Sigun kadagiti fish vendors a nakauman ti Bombo Radyo Baguio, gapu daytoy iti maipatpatungpal a lockdown wenno quarantine status a nagresulta tapnu marigatanda nga agbiahe tapnu apan gumatang iti ilakoda nga ikan.
Iti agdama, kangrunaan a ngimmina ti galunggong a magatang ita iti P200 agingga P220 tunggal kilo manipud iti sigud a P180-P190.
Kinunada nga adu met ti gumatgatang ti galunggong iti baet a ngimmina daytoy.
Maipalagip nga iti dadduma a merkado iti pagilian ket ngimmato iti P20-40 ti tunggal kilo ti imported ken local a galunggong.
Inkalintegan met ni Agriculture Secretary William Dar a ‘closed fishing season’ ita a panawen.
Kabayatanna, iti dadduma nga ikan, magatang ti tunggal kilo ti bangus iti P180-P200; ti tilapia iti P120; ti pusit iti P200; ti pasayan iti P400 ken ti tahong ket P120 bayat a ti boneless bangus ket P180.
