Naibinsa-binsa ti calendar of activities para iti mapadpadaanan a 2025 Barangay and Sangguniang Kabataan Elections (BSKE).
Iti pannakiuman ti Bombo Radyo kenni Atty- Elenita Julia Tabangin-Capuyan, Election Supervisor-COMELEC Cordillera, kinunana a kas maibasar iti Comelec Resolution No. 11132, naituding a maangay ti 2025 Barangay and Sangguniang Kabataan Elections (BSKE) inton December 1, 2025.
Sigun kenkuana, manual voting ti nasao nga eleksyon no sadino awan ti maaramat a makina rason a ti eleksyon ket mangrugi iti alas syete iti agsapa agingga alas tres iti malem.
Nupay kasta, manamnama metlaeng a maipatungpal ti early voting iti 5 am agingga 7 am kas metlaeng ti naaramid bayat ti kaleppas a national ken local elections.
Kabayatanna, naituding ti election period inton October 21 agingga December 31, 2025 no sadino ti panangipila iti candidacy dagiti agtarigagay nga agkandidato ket inton October 1 aginga 7, 2025.
Naituding met ti campaign period inton November 20 agingga 29, 2025 no sadino ditoy a mabalinen a maiwaras dagiti campaign material pakairamanan dagiti advertisements dagiti kandidato.
Malaksid iti dayta, naituding ti applications for registration dagiti saan a nakarehistro a botante para iti 2025 Barangay and Sangguniang Kabataan Elections (BSKE) inton July 1 agingga July 11, 2025.
Innayon pay ni Atty. Capuyan a naituding inton Hulyo agingga Agosto iti agdama a tawen ti pannakatarimaan dagiti addaan iti kamali iti nagan ken dadduma pay.
Kagiddan dayta, inlawlawag metlaeng ti nasao nga opisyal a ti mabalin a tumaray iti Sangguniang Kabataan ket dagiti agtawen iti 18 agingga 24 agsipud ta dagitoy ti maituding nga agtutubo bayat a dagiti mabalin nga agbutos iti daytoy ket dagiti agtawen iti 15 agingga 30.
