BAGUIO CITY – Panggep ti Baguio City nga agutang ti agarup $50 million wenno katukad ti P2.8 billion para iti repair ken rehabilitation ti sewage treatment plant idiay North Sanitary Camp, Baguio City.
Iti interview ti Bombo Radyo kenni Councilor Betty Tabanda, rumbeng laeng a matarimaan ti sewage treatment plant ti siyudad tapno ad-adda pay nga agfunction ken ag-operate a nasayaat agsipud ta naipasdek daytoy tallo pulo a tawenen ti napalabas.
Inlawlawag ni Tabanda a tapno maiyurnos ti nasao a proyekto ket kasapulan nga agutang ti siudad ti dakkel a gatad iti Asian Development Bank.
Nupay kasta, saan a mabalin a ti lokal a gobyerno ti Baguio City ti direkta nga agutang iti nasao a bangko gapu ta saanda nga awaten ti Local Government Unit.
Gapu iti daytoy, kinasarita ni Mayor Benjamin Magalong ti national government agency partikular ti Tourism Infrastructure and Enterprise Zone Authority (TIEZA) tapno isuda ti agutang para iti siyudad.
Nupay kasta, inaklon ni Tabanda a pampanunotenda nu kabaelan ti siyudad ti Baguio a bayadan ti binilbilyon a gatad nu bilang man agutang dagitoy para iti nasao a proyekto.
Dinakamatna a manipud iti ginasgasut a household iti siyudad a nakakonektar iti sewer lines, 10,000 laeng kadagitoy partikular dagiti business establishments ti agbaybayad ti sewer fee.
Gapu iti daytoy, planoda a pagbayaden amin dagiti umili nga addaan ti septic tank uray pay saan a nakakonektar dagitoy iti sewer line agsipud ta maipaayan dagitoy ti prebelihiyo a tunggal uppat a tawen ket madalusan ti septic tank dagitoy.
Malaksid iti dayta, panggepda pay a pagbayaden ti environmental fee dagiti amin a turista a sumrek iti syudad.
Nupay kasta, impetteng ni Tabanda a saan a kas karina ti panggep ti siyudad nga agutang asipud ta adu dagiti proseso a pagdalanan dagitoy sakbay a maaprobaran daytoy.
Impeksana pay a nasken nga agbiruk ti siyudad ti sabali a wagas tapno saanen a nasken nga agutang dagitoy tapno saan a kaasi dagiti agdama nga opisyales ken dagiti sumarsaruno pay.//Rosemarie Bulsao
