BAGUIO CITY – Naaprobaran iti maudi ken pinal a panagbasa iti lokal a konseho ti Baguio ti singasing nga ordinansa para iti panakailatang ti P4.8-M iti pondo ti City Health Services Office (CHSO) ita a tawen tapnu manayonan ti binulan nga allowance dagiti amin a barangay health workers (BHWs) ken barangay nutrition scholars (BNS) ti Baguio.
Nailanad iti Ordinance No. 13, series of 2021 a nag-epektibo kuma daytoy idi napalabas a bulan ken manipud iuti P500 a binulan nga allowance dagiti BHWs ken BNS ti Baguio ket makaawaten dagitoy iti P1,000.
Kinuna ti lokal a konseho a nabukel ti ordinansa kas panangipakita ti lokal a gobyerno ti Baguio iti panagyaman kadagiti nasao a BHWs ken BNS gapu iti dakkel unay a trabaho dagitoy nangruna iti agdama a community quarantine tapnu makontrol ti panagwaras ti COVID-19 iti siudad.
Mangnamnama dagiti opisyal ti siudad a babaen iti nasao nga addang ket ad-adda a mapatibker ti pakinakem dagiti BHWs ken BNS tapnu ad-adda nga igaedda pay ti panagserbida iti barangay dagitoy.
