Dumanonen iti agarup P768 million ti danyos ti El Niño phenomenon iti sektor ti agrikultura iti rehiyon Cordillera kas maibasar iti kaudian a datos ti Department of Agriculture.
Iti panakiuman ti Bombo Radyo kenni Jonathan Llanes, Information Officer ti Department of Agriculture – Cordillera, kinunana a 40,712 a metric tons ti nadadael iti produkto a mais, pagay ken kadagiti high value crops nu sadino dumanon iti 11,671 a mannalon ti naapektaran.
Sigun kenni Llanes, ti Ifugao ti nakailista ti kadakkelan a danyos a dumanon iti P311 million, sarunoen ti Kalinga a P263.8 million.
Innayona pay a dumanon iti P638 million ti danyos ti nadadael iti produkto a mais; P127 million iti pagay; ken P1.5 million met ti danyos iti high value crops.
Nupay kasta, addan ti intervention nga inaramid ti Department of Agriculture tapno matulongan dagiti naapektaran a mannalon.
Karamen dagitoy ket panakaipaay ti water pump, hose, bin-i ken daduma pay a kagawaan a kasapulan iti panagtalon wenno kadagiti garden.
Kabayatanna, nakasagana metten ti ahensiya para iti manamnama a La Niña.
Nakasagana metten ti P488 million a pondo a maaramat iti nasao a panawen.
Malaksid iti dayta, agpalpalagip ni Llanes iti publiko a nasken nga ipakaammo kadagiti local government units dagiti pakaseknan iti sektor ti agrikultura para iti dagus a panakaikoordinarna iti Department of Agriculture – Cordillera.//Bombo Mera Pacpacan
