BAGUIO CITY – Naipatungpal ti voter education para iti demo ti kaunaan nga Automated Counting Machine para iti midterm elections inton sumaruno a tawen nu sadino naipatungpal daytoy idiay Tabuk City, Kalinga.
Iti interview ti Bombo Radyo kenni Atty. Reyman Solbita, Tabuk City Election Officer, napintas daytoy gapu ta laptop ti maaramat, friendly ken simple nu idilig iti sigud a machine.
Kinunana pay a saanen a marigatan dagiti mannursuro nga agbalin nga electoral boards nga agtraining ken agbitbit iti machine gapu ta handy daytoy.
Inlawlawag ni Solbita a naidumduma daytoy a machine gapu ta nabiit ti diagnostic, panangisagana kadagiti machine, ken nalag-an ti battery pack ken nabayag ti life span-na.
Mabalin pay a tuloy-tuloy a maaramat ti machine uray awan ti kuryente.
Impaganetgetna nga adda ti tranparency iti maipatungpal a national ken local election inton sumaruno a tawen.
Inlawlawag ni Solbita a maipaayan dagiti botante ti segundo tapno kitaen wenno i-browse ti ballot dagitoy babaen iti screen ti baro a makina sakbay a rumuar ti resibo.
Innayona a kabaelan ti baro a sistema a mabasa ti papel a nagbutosan uray nu crampled daytoy laketdi saan a napigis wenno nakabilan ti aniaman a marka.
Impetteng ti opisyal nga adda ti security features ti machine rason a saan a basta basta a balota ti akseptaren daytoy.
