Naapektaran dagiti dua a pamilya iti nargaay a daga sadiay Suello Wakat Road, Baguio City gapu paylaeng iti agtultuloy a panagtudtudona.
Iti panakiuman ti Bombo Radyo iti Baguio City Police Station, Police Station 10, kinunada a ti nargaayan ti daga ket paset ti Data Aggragetes no sadino maysa a pagtaengan ken maysa a nakaparada a truck a naglaon iti 5k hollowblocks ti natnag.
Awan met ti nailista a nadangran iti napasamak a landslide.
Kabayatanna, iti panakiuman ti Bombo Radyo kenni Christopher Dulnuan, maysa kadagiti residente sadiay, kinunana a ti kibayagna sadiay ket saan a nargaay daytoy iti baet a dump laeng ti daga sadiay.
Nupay kasta, gapu iti masansan a panagtudtudona ket daytoy ti rason iti panakatnag ti nasao a pagtaengan.
Sigun kenni Dulnuan, nadlawda a nagsikig ti nasao a pagtaengan rason nga impakaammo-da kadagiti bumalay iti nasao a pagtaengan.
Apaman a nakaruar dagiti bumalay ket ditoy metten a natnag ti balay dagitoy bayat a ti maysa met a balay ket nadadael ti riprap wallna.
Kabayatanna, dagiti pamilya nga agnanaed iti natnag a pagtaengan ket nagturong metten dagitoy iti maysa a balayda sadiay Tuba, Benguet.
Ti met maysa a pamilya ket nagturongda kadagiti kabagyanda ngem nagbati ti maysa kadakuada nga agbantay iti pagtaengan dagitoy.
Naipaayan metten dagitoy iti tulong.//Bombo Noveh Organo
