BAGUIO CITY – Impasigurado ti General Manager ti Maharlika Livelihood Center a saan a dakkel wenno nalawa ti naapektaran ti uram iti maikatallo a kadsaaran ti nasao a pasdek.
Iti panakiuman ti Bombo News Team, inlawlawag ni Robert Arevalo a ti nauram ket 3rd floor ti Marbay nu sadino daytoy ket pasdek nga adjacent wenno adda laeng iti likudan ti Maharlika Livelihood Center.
Innayona nga uppat nga stalls ti nadadael ken karamanen dagiti sumagmamano nga stalls nga adda iti parking area iti nasao a pasdek.
Nagkiddaw daytoy ti pannakaawat manipod kadagiti tenants gapu ta saan pay laeng a mailukat ti pasdek agingga a malpas ti imbestigasyon ken panagdalus dagiti maseknan iti lugar.
Mainaig iti dayta, dagiti uppat nga stalls a nauram ket nabigbig nga antique shop, eatery, ken meat shop.
Napaawid paylaeng dagiti tenants ken inlawlawag pay ni Arevalo a saan pay a mailukat ti pasdek ita nga aldaw agingga inton bigat, ken posible a mailukat daytoy inton Huwebes.
Iti sabali a bangir, inallukoy ni Mayor Benjamin Magalong dagiti tenants a mabalinda a makipaset iti panagdalus a maisayangkat inton bigat, Hulyo 17.
Dagiti mangkayat ket mabalin nga agpalista tapno makaawatda ti P500 a cash tunggal aldaw.
Inlawlawagna a saan daytoy a mandatory ngem kinunana a dakdakkel ti posibilidad a maileppas a nasapa ti panagdalus nu adu ti tumulong manipod kadagiti tenants.
