Nairikeppen idi kalman ti Incident Command Post (ICP) para iti Operation Sofia idiay Sagada wenno ti panangsarak iti menor-de-edad a babae nga immunan a naireport a mapukpukaw a ni Sofia.
Nupay kasta, agtalinaed a nakalukat ti Emergency Operations Center (EOC) kasta met nga agtalinaed ti koordinasyon ken information monitoring kas agtuloy ti panangsarak ti komunidad kenni Sofia.
Nagserbi ti Incident Command Post (ICP) kas puso ken sentro ti panangsarak iti biktima no sadino nag-uummong dagiti responders ken volunteers, naadal dagiti impormasyon, ken nu sadino, naplano dagiti naipatungpal nga operasyon.
Maipalagip nga iti las-od ti nasao a 14 nga aldaw, nagmaymaysa dagiti nagduduma nga opisina, grupo, komunidad, ken volunteers tapno masarakan ti menor-de-edad a babae.
Nagturong dagitoy kadagiti nagduduma a paset ti lugar ken kabangibang pay a luglugar.
Sigun iti pablaak ti lokal a gobyerno ti Sagada, nagbalin manen a dalan ti nasao nga operasyon iti panangiparangarang iti ‘binnadang’ iti nasao a komunidad.
Impetteng metlaeng daytoy a nupay nairikkepen ti ti Incident Command Post (ICP), saan nga agleppas ti “Operation Sofia”.
Agtuloy latta ti panangsarak ti komunidad iti biktima bayat nga agtalinaed met nga aktibo ti Emergency Operations Center (EOC), koordinasyon ken information management.
Kagiddan dayta, guyguyugoyen ti munisipyo ti Sagada ti publiko, a nu adda dagiti impormasyon da a mabalin a makatulong iti panang-locate kenni Sofia ket makikoordinarda laeng kadagiti otoridad.
Iti baet dayta, pinagyamanan ti nasao nga opisina amin a nakipaset ken nagsakripsyo para iti nasao nga operasyon.