Dumanon iti 1246 ti bilang ti kaso ti dengue iti probinsya ti Benguet ita a tawen no sadino nababbaba daytoy iti 74% manipud iti datos idi napalabas a tawen a dumanon iti 5803 a kaso.
Iti panakiuman ti Bombo Radyo kenni Dr. Cham Bacuso, Benguet Rural Health Physician, kinunana a ti nasao a bilang ket maibasar iti datos dagitoy manipud Enero agingga Agosto iti agdama a tawen.
Sigun kenkuana manipud iti nasao a bilang ita a tawen ti munisipyo ti Itogon, Benguet ti nakairekord iti kangatuan a bilang a dumanon iti 368, sarunuen ti La Trinidad, Benguet a dumanon iti 212 bayat a 146 met ti nairekord sadiay Tublay, Benguet.
Kinunana a maysa ditoy ti pimmusay no sadino manipud daytoy sadiay Tuba, Benguet.
Kagiddan dayta, impettengna a bimmaba ti kaso ti nasao a sakit ita a tawen gapu iti panagsagana ti publiko ken gapu metlaeng iti sasaaden ti panawen.
Nupay kasta, inyunay-unayna a nakasagana paylaeng dagitoy idi enero no sadino adda dagiti aktibidad kas ti information dissemination, kasta metten a nakasagana amin a commodities a maaramat iti kanito a kasapulan.
Kabayatanna, nagpalagip manen daytoy iti publiko a dagus nga agpakonsulta kadagiti ospital nangruna no adda dagiti sintomas a mapasaran kas ti rashes, panaggurigor ken dadduma pay.
